Paqja mes dy klaneve të aksionerëve në Digitalb nuk ka zgjatur shumë. Prej javësh të gjitha pagesat e kompanisë janë bllokuar, përfshi pagat e punonjësve; ndërkohë të shtunën Federata Shqiptare e Futbollit (FSHF) njoftoi se i ka hequr kompanisë të drejtat televizive të transmetimit të kampionatit shqiptar të futbollit, për shkak të mosshlyerjes së pagesave prej më shumë se një viti.

Sipas FSHF-së, ky vendim vjen si pasojë e neglizhencës kontraktore nga ana e subjektit të licencuar për zbatimin e kushteve të dakordësuara në kontratë dhe ezaurimit të të gjithë hapave të nevojshme ligjore.

“Pavarësisht sa më sipër, duke mos dashur “black-out”-in e aktivitetit futbollistik FSHF ka propozuar më datë 04.06.2020 një skedul pagesash për të amortizuar borxhin duke vendosur një afat të arsyeshëm për pagimin e tyre. Me kalimin e këtij afati dhe në mungesë të një përgjigje zyrtare, FSHF njofton me keqardhje se është e detyruar të pezullojë transmetimin për “Digitalb”. Pa paragjykuar hapat e nevojshëm ligjor, ky ndalim i transmetimit do të vijojë deri në përmbushjen e detyrimeve kontraktore. FSHF dëshiron të nënvizojë se borxhi i akumuluar është i konsiderueshëm dhe se në kushtet kur këto janë të ardhura të drejtpërdrejta të klubeve anëtare, të cilat privohen padrejtësisht prej tyre, aq më shumë në situatën e vështire ekonomike të shkaktuar nga përhapja e COVID-19. Sakaq, krahas përpjekjeve për kapërcimin e kësaj situate, FSHF ka marrë përsipër kostot për transmetimin e ndeshjeve në faqen e saj zyrtare në internet ëëë.fshf.org pa pagesë,” thuhet në njoftimin e FSHF.

Megjithatë, problemi është më i komplikuar se kaq. Presidenti i FSHF-së, Armand Duka, është pjesë e grupit të aksionerëve në betejë për kontrollin e kompanisë me familjen e themeluesit, Dritan Hoxha. Në fillim të këtij viti, palët ranë dakord për një armëpushim, sipas të cilit Vjollca Hoxha pranoi të largohej nga drejtimi i Digitalb dhe kompania do të drejtohej nga dy administrator, një për secilin klan. Të gjitha veprimet në emër të kompanisë mund të bëhen vetëm me firmën e të dy administratorëve.

Palët kanë rënë dakord që Digitalb të menaxhohet nga këta dy administratorë, deri në muajin gusht, kur do të vendoset një administrator i ri. Por, së fundmi, mosmarrëveshjet kanë shpërthyer sërish.

Administratorja e klanit anti-Hoxha, Eglantina Lamaj (njeri i besuar i Aleksandër Frangajt), ka refuzuar të firmosë pagesat e reklamave të Digitalb në Top Channel. Si kundërpërgjigje, Vjollca Hoxha ka urdhëruar përfaqësuesin e saj Redi Lamaj, të mos firmosë asnjë pagesë tjetër, përfshi pagat e punonjësve.

Në këto kushte, duket se kompania ka hyrë në kolaps. Familja e Vjollca Hoxhës ngelet aksioner kryesor në digitalb, me 43% të aksioneve, por tashmë nuk zotëron më kuotat për të vendosur e vetme. Aksionerët e tjerë (Armand dhe Agron Duka, Edmond dhe Niko Leka, Petraq Shomo, Arben Taipi, Aleksandër Frangaj, Samir Mane), së bashku, zotërojnë shumicën e aksioneve dhe duket se janë grupuar me qëllimin për ta hequr Digitalb nga duart e Vjollca Hoxhës.

{"email":"Email address invalid","url":"Website address invalid","required":"Required field missing"}

Gjithashtu mund t'ju interesojnë

{"email":"Email address invalid","url":"Website address invalid","required":"Required field missing"}
>